Tsohon shugaban Najeriya, Goodluck Jonathan, ya sake bayyana yadda satar ‘yanmatan Chibok ta rikita shi kuma ta bar tabo a tarihin gwamnatinsa. Me ya ce a wani sabon taro da aka gudanar a Abuja?
Tsohon Shugaban Najeriya, Dr. Goodluck Jonathan, ya bayyana cewa har ya zuwa ƙarshen rayuwarsa ba zai taɓa mantawa da al’amarin satar ɗalibai mata na Chibok ba – lamarin da ya ce ya kai wata barna da za a ci gaba da danganta da gwamnatinsa.
Jonathan ya yi wannan bayani ne ranar Juma’a a babban birnin tarayya Abuja lokacin gabatar da wani sabon littafi mai suna “Scars: Nigeria’s Journey and the Boko Haram Conundrum,” wanda tsohon Babban Hafsan Tsaro, Janar Lucky Irabor, ya wallafa.
A lokacin jawabin nasa, Jonathan ya jaddada yadda take littafin ya dace da irin ƙalubalen da suka shugabanci gwamnatinsa, musamman batun sace ‘yanmatan Chibok da kungiyar Boko Haram ta yi a shekarar 2014.
“Kamar yadda Bishop Kukah ya ambata, babu wata tiyata da za ta share wannan tabo daga tarihi. Gaskiya ne, har abada zan zauna da wannan nauyin a raina,” in ji shi.
Satar ɗaliban Chibok ta shahara a faɗin duniya, lamarin da ke daga cikin abubuwan da suka janyo wa gwamnatin Jonathan matsaloli da kalubale – musamman a zaben 2015.
Leave a Reply