Idan ba ka yin asuwaki, lokaci ya yi da za ka fara daga yau.
Ba kawai don tsabtace hakora ba ne, har ma don kare lafiyar jikinka da samun lada a wajen Allah.
Me yasa ya kamata ka koma yin Asuwaki?
A yau, yawancin burushin zamani da toothpaste suna dauke da wasu sinadarai kamar Triclosan, wanda wasu bincike suka nuna yana iya shafar tsarin sinadaran jiki (hormonal disruption).
Duk da cewa ana amfani da shi wajen kashe kwayoyin cuta, akwai muhawara kan illolinsa ga lafiyar dan Adam.
Shi kuwa Asuwaki, musamman na bishiyar Salvadora persica (wanda aka fi sani da miswak), ba shi da irin wadannan illoli.
A fannin ilimin magungunan tsirrai (Pharmacognosy), an tabbatar da cewa yana dauke da sinadarai masu amfani kamar:
Antibacterial agents – masu kashe kwayoyin cutar da ke janyo rubewar hakora
Fluoride da Silica – masu karfafa hakora da sanya su haske
Essential oils – masu taimakawa wajen magance warin baki da inganta tsaftar baki
Amfanin Asuwaki Ga Lafiyar Jiki
Mutane da dama sun bayar da rahoton cewa yin asuwaki yana taimakawa wajen rage wasu matsalolin ciki, domin sinadaransa na haduwa da yawu su shiga ciki suna aiki.
Haka kuma, ana danganta shi da:
Rage warin baki
Saukaka ciwon kai
Rage kasala
Inganta lafiyar maza
Duk da haka, yana da kyau a tuna cewa asuwaki kari ne ga tsaftar baki, ba maye gurbin shawarar likita ba idan akwai matsalar lafiya mai tsanani.
Asuwaki Sunnah Ce
Baya ga amfanin lafiya, asuwaki babbar sunnah ce ta Manzon Allah (SAW).
Manzon Allah (SAW) ya ce:
> لَوْلاَ أَنْ أَشُقَّ عَلَى أُمَّتِي لأَمَرْتُهُمْ بِالسِّوَاكِ عِنْدَ كُلِّ صَلاَةٍ
Ma’ana: “Da ba don kada in tsananta wa al’ummata ba, da na umarce su da yin asuwaki a lokacin kowace sallah.”
Haka kuma ya ce:
> السِّوَاكُ مَطْهَرَةٌ لِلْفَمِ مَرْضَاةٌ لِلرَّبِّ
Ma’ana: “Asuwaki tsarkakewa ne ga baki, kuma abin neman yardar Ubangiji ne.”
Asuwaki ba kawai don goge hakori aka samar da shi ba.
Sunnah ce mai dauke da lada, tsafta, da kuma amfanin lafiya.
Idan kana son bin koyarwar Manzon Allah (SAW) tare da kula da lafiyarka, ka sanya asuwaki ya zama abokin tafiyarka na yau da kullum.
Wallahu Ta’ala A’alam.
—
